සිංහල සංස්කෘතිය තුළ අලුත උපන් දරුවෙකුට නම් තැබීම

සිංහල සංස්කෘතිය තුළ අලුත උපන් දරුවෙකුට නමක් තැබීම සුළු පටු කාර්යයක් නොවේ. මම ද මේ අත්දැකීමට දෙවරක් මුහුණ දුන්නෙක්මි. එයට හේතුව වන්නේ නම් තැබීමේ දී සාධක කිහිපයක් සලකා බැලීමට සිදුවන නිසාය. සමහරු මේ ගැන එතරම් නොතැකුව ද මින් සාධක එකක් දෙකක් හෝ සලකා බලති. අනෙකුත් නම් හා සසඳන විට සිංහල නම්වල වේගවත් විකාශයට/පරිණාමයට ද මෙය හේතුවක් වී ඇත. අයෙක් මෙය හුදෙක් විකාර රූපී නම් ඇතිකරන, මෙයම ව්‍යාපාරයක් කරගත් පිරිසකගේ පැවැත්ම තහවුරු කරන, සමාජයේ දහසකුත් එකක් විලාසිතා අතරට තවත් විලාසිතාවක් එක් කළ ක්‍රියාවක් සේ සලකති. ඒ කෙසේ වෙතත් නමක් තෝරා ගැනීමේ දී හෝ නිර්මාණය කිරීමේ දී ශාස්ත්‍රීයත්වය හා ප්‍රායෝගිකත්වය යන දෙකම මත පදනම් වන්නේ නම් මැනවි.

ජ්‍යෝතිෂය අනුව නමකට අකුරු දෙන්නේ උපන් දවසට, ලග්නයට හා උපන් නැකතට ය. එමෙන්ම නැකත් පාදය අනුවත්, උපන් නැකත අනෙක් නැකත් සමඟ ඇති සම්බන්ධතාවය අනුවත් අක්ෂර තෝරනු ලැබේ. ඒ පිළිබඳ වැඩිදුර විස්තර පහත දැක්වේ.

උපන් දවස අනුව නිර්දේශිත අකුරු

සඳුදා – ය, ර, ල, ව, ශ, ෂ, ස, හ, ළ
අඟහරුවාදා – ක, ඛ, ග, ඝ, ඬ
බදාදා – ට, ඨ, ඩ, ඪ, ණ
බ්‍රහස්පතින්දා – ත, ථ, ද, ධ, න
සිකුරාදා – ච, ඡ, ජ, ඣ, ඤ
සෙනසුරාදා –  ප, ඵ, බ, භ, ම
ඉරිදා – අ, ඉ, උ, එ, ඔ

ලග්නය අනුව නිර්දේශිත අකුරු

මේෂ ලග්නය – අ, ආ, ශ
වෘෂභ ලග්නය – ඉ, ඊ, උ, ෂ
මිථුන ලග්නය – ඌ, ඍ, ඎ, ස
කටක ලග්නය – ග, ඝ, එ, හ
සිංහ ලග්නය – ඓ, ඔ, ඖ, ළ
කන්‍යා ලග්නය – අං, අඃ
තුලා ලග්නය – ක, ඛ, ග, ඝ, ඞ
වෘශ්චික ලග්නය – ච, ඡ, ජ, ඣ, ඤ
ධනු ලග්නය – ට, ඨ, ඩ, ඪ, ණ
මකර ලග්නය – ත, ථ, ධ, ද, න
කුම්භ ලග්නය – ප, ඵ, බ, භ, ම
මීන ලග්නය – ය, ර, ල, ව

උපන් නැකත අනුව නිර්දේශිත අකුරු

නැකත	1 වැනි පාදය	2 වැනි පාදය	3 වැනි පාදය	4 වැනි පාදය
අස්විද	චු	චෙ	චො	ල
බෙරණ	ලි	ලු	ලෙ	ලො
කැති	අ	ඉ	උ	එ
රෙහෙණ	ඔ	ව	වි	වු
මුවසිරස	වෙ	වො	ක	කි
අද	කු	ඝ	ඞ	ඡ
පුනාවස	කෙ	කො	හ	හි
පුෂ	හු	හෙ	හො	ඩ
අස්ලිස	ඩි	ඩු	ඩෙ	ඩො
මා	ම	මි	මු	මෙ
පුවපල්	මො	ට	ටි	ටු
උත්‍රපල්	ටෙ	ටො	ප	පි
හත	පු	ෂ	ණ	ඨ
සිත	පෙ	පො	ර	රි
සා	රු	රෙ	රො	ත
විසා	ති	තු	තෙ	තො
අනුර	න	නි	නු	නෙ
දෙට	නො	ය	යි	යු
මුල	යෙ	යො	බ	බි
පුවසල	බු	ධ	එ	ඪ
උත්‍රසල	බෙ	බො	ජ	ජි
සුවණ	ජු	ජෙ	ජො	ෂ
දෙනට	ග	ගි	ගු	ගෙ
සියාවස	ගො	ස	සි	සු
පුවපුටුප	සෙ	සො	ද	දි
උත්‍රපුටුප	දු	ථ	ඣ	ඤ
රේවතී	දෙ	‍දො	ච	චි

මෙහිදී නැකත් පාදය අනුව ම අක්ෂර තෝරාගත හැකි නම් වඩාත් යෝග්‍ය වේ.

උපන් නැකතට “සුබදායී” මෙන්ම “අසුබදායී” ලෙස බලපාන නැකැත් වර්ග පවතින නිසා ඒ අනුව ද අක්ෂර තෝරා ගැනේ. ජන්ම, සම්පත්, ක්ෂේම, සාධක, මිත්‍ර, පරම මිත්‍ර යනාදිය සුබ කාණ්ඩ වන අතර විපත්, ප්‍රත්‍යාරි, වධ යනාදිය අසුබ කාණ්ඩයන් ය. එමනිසා එකී “සුබ” වර්ගයන්ට අයත් නැකත් වල අක්ෂර තෝරා ගැනීමට ද සැලකිලිමත් වන්නේ නම් මැනවි. බොහෝ විට අනෙක් සාධකවලට වඩා උපන් නැකතට සහ ලග්නයට මුල් තැන දීමක් සිදු වේ.

ශබ්ද ශාස්ත්‍රය වනාහී නම් තේරීමේ දී හා නිර්මාණය කිරීමේ දී අවධානය යොමු කෙරෙන තවත් ක්ෂේත්‍රයකි. ඉතා පෘථුල ලෙස හැදෑරිය යුතු විෂයක් වන මෙය ජ්‍යෝතිෂය සමඟ ද සමීප සම්බන්ධතාවයක් දක්වයි. මෙහි සඳහන් කරනුයේ මූලික හා ප්‍රචලිත කරුණු කිහිපයක් පමණි.

ගණ

භූමි, දේව, චන්ද්‍ර, ජල යනුවෙන් සුබ ගණ හතරකි. සූර්ය, ගිනි, වායු, ආකාශ යනුවෙන් අසුබ ගණ හතරකි. ගණයකට මාත්‍රා තුනකි. සරලාකාරයෙන් පවසතොත් මාත්‍රාවක් කෙටි අකුරක් (ලඝු) හෝ දීර්ඝ අකුරක් (ගුරු) විය හැකිය. එක් එක් ගණය හා එහි විපාක පහත දැක්වේ.

ගණය	අක්ෂර සංයෝජනය	ප්‍රතිඵල
භූමි	ගු ගු ගු	ජය
දේව	ල ල ල	තේජස්
චන්ද්‍ර	ගු ල ල	සෙත්
ජල	ල ගු ගු	ආයු
සූර්ය	ල ගු ල	ලෙඩ
අග්නි	ගු ල ගු	දැඩි ශෝක
වායු	ල ල ගු	මරණ
ආකාශ	ගු ගු ල	ව්‍යසන

උදාහරණයක් වශයෙන් “තනූජා” යන වචනය ගතහොත් එය කෙටි අක්ෂරයක් සහ දීර්ඝ අක්ෂර දෙකකින් (ල/ගු/ගු) සෑදී තිබේ. එනම් ජල ගණයට අයත් වේ.

මීට අමතරව එක් එක් ගණයට හිමි නැකතක් ද වේ. මෙය ශබ්ද ශාස්ත්‍රය ජ්‍යෝතිෂ්ශාස්ත්‍රයත් සමඟ සම්බන්ධ වන එක් තැනකි. එනිසා නැකතට ගැලපෙන සේ ගණ තෝරන්නෝ ද වෙති.

අක්ෂර වර්ග

දිව්‍ය, මනුෂ්‍ය, අපාය වශයෙන් අක්ෂර වර්ග තුනකි. නම්වල මුල් අකුරු සඳහා දිව්‍ය හෝ මනුෂ්‍ය අක්ෂර යොදා ගැනීම සුදුසු බව පැවසේ.

දිව්‍ය අක්ෂර – ඉ, ඔ, ට, ඩ, ත, ද, ල, ව, ස
මනුෂ්‍ය අක්ෂර – උ, ප, බ, ග, හ
අපායක්ෂර – එ, ක, ය, ම, ර, ජ, අ, ණ, න, ළ, අං

අක්ෂර වේධය

සාමාන්‍යයෙන් මෙය එතරම් සලකා බැලෙන සාධකයක් නොවේ. වේධය යනුවෙන් මෙහිදී අදහස් කරනුයේ ගැටීමය. එනම් නාමයන් හි මුලකුරු වල ස්වරයන්හි ගැටීමයි. සෙත් කවි/ වස් කවි නිර්මාණයේ දී මේ පිළිබඳව දැඩි සැලකිල්ලක් දක්වයි. මව්පියන්ගේ සහ අනෙකුත් සහෝදර/සහෝදරියන්ගේ නම් හා වේධ නොවන පරිදි මුලකුරු තෝරා ගැනීම භාවිතාව යි.

• “අ” ස්වරයට “උ” ස්වරය වේධ වේ
• “ආ” ස්වරයට “ඌ” ස්වරය වේධ වේ
• “ඉ” ස්වරයට “එ, ඒ” ස්වරය වේධ වේ
• “ඊ” ස්වරයට “ඔ, ඕ” ස්වරය වේධ වේ

මෙවන් ශාස්ත්‍රීය සාධක පිළිබඳව සැලකිලිමත් වන අතර ප්‍රායෝගිකත්වය සහ නමේ අර්ථය පිළිබඳව ද දැඩි අවධානයක් යොමු කළ යුතුය. දරුවාගේ නම පැහැදිලිව පහසුවෙන් උච්චාරණය කළ හැකි වීම ඉතා වැදගත් වේ. එසේ නොවුණහොත් ගණ පිහිටා නිර්මාණය කළ නමක වුවද අපේක්ෂිත ප්‍රතිඵලය වෙනුවට ප්‍රතිවිරුද්ධ ඵලයක් ලැබීමට හැකියාව ඇති බැවිනි.

වර්තමානයේ නමක් ඉංග්‍රීසි භාෂාවෙන් ලියද්දී ව්‍යාකූලත්වයකින් තොරව සන්නිවේදනය කිරීමට පුළුවන් විය යුතු බව මගේ අදහසයි. එමෙන්ම නම සම්පූර්ණ වශයෙන් කියවද්දී රිද්මයානුකූල බවක් පැවතීම ද සුදුසු වේ.

මේ සියලු කරුණු සලකා බැලූවිට වඩාත් ම යෝග්‍ය නමක් තෝරාගැනීම ඉතා අපහසු කාර්යයක් බව වැටහෙනු ඇති. එහෙත් මේ කිසිවකට අනුගත නොවුණු නම් ඇති, යහපත්, සාර්ථක ජීවිත ගතකරන පුද්ගලයින් ද සිටින බව විශේෂයෙන් පැවසිය යුතුය. ඒ අතරම සියලු සාධක බලා පිහිටුවන ලද නම් ඇති, එහෙත් ඉතා අවාසනාවන්ත ජීවිත ගත කරන, සමාජ විරෝධී ක්‍රියාවන්හි පවා නිරත පුද්ගලයින් ද සිටින බව ඔබට වැටහෙනු ඇති.

අවසාන වශයෙන් පැවසිය යුතු දෙයක් තිබේ. එනම්, මා මෙම විෂයෙහි ප්‍රවීණයෙකු නොවන අතර අත්දැකීමෙන් ලත් දැනුම් කරුණු පමණක් මෙහි දක්වා ඇති බවයි. එනිසා හැකි සෑමවිටම ක්ෂේත්‍රයේ පරිණත ප්‍රවීණයෙක් වෙත ගොස් ඔබගේ අවශ්‍යතාවය ඉටුකරගැනීමට වගබලා ගන්න.

උදේන්ද්‍ර ගීගනගේ
Twitter: @udendra